anter

11.03.2010. četvrtak

N I T I

Moja je mater

U pauzama

Između dva dičja plača

Bile i crne niti prela

Od oštre vune

Ovce pramenke

 I za svoju dicu

Teple bičve plela

Evala van i dobro mi stojte!
Broj komentara: 4
permalink  print  komentiraj


10.03.2010. srijeda

POST FESTUM SEJAČKE BUNE

Mora san učinit mali odmak da bi sredija emocije i zapažanja. Ni dobro uvik poletit na prvi balun. Nezagrijan oli pregrijan moreš i past priko njega i koju kost polomit.

 

I tako, tresla se gora, rodija se miš. Sejačka buna kontra Vlade sličila je na meč jedneg dobrog boksača, koji je cili meč jema u rukama i protivnika je već bija stira u mišju rupu, kad mu se onaklo da mu popusti koncentracija i jedan ga dobro odmiren protivniški kroše pošje u carstvo snova. Žalosno, ali istinito i već puno puta viđeno na Rvackoj pulitiškoj sceni. A zašto je tome tako?

 

Moju generaciju, nike malo starije, a bome i mnoge mlađe, učilo je da je fašističko-nacistički okupator u Drugen ratu u našoj zemji provodija taktiku „zavadi pa vladaj“. U te generacije koje je temu učilo spada i današnja naša pulitiška elita. Samo, koliko se sićan, ni nas učilo da bi tu taktiku priminjivali na vlastitu narodu, vengo zaraj tega da bi se od nje mogli branit, ako bude potribe. Međutin, meni pari da su naše pulitiške elite (od ćaće nan, pa nadaje) tu taktiku privatile ka svoju na način kako je to radija i fašističko-nacistički okupator pri sedandesetak godin. Zašto ja tako mislin?

 

Zato ča je očito da nas od početka ka narod žele (pod krinkon nikeg pomirenja) ča višje razjedinit. Sićate li se jošće indeje o „stališima“? Pa indeje o dvista bogatih obiteji koje će vodit zemju? Pa opaske o „stoci sitneg zuba“ za razlike od tobožnje ujuđene elite? Neprirodna podila zemje na županije i cipanje prirodnih ekonomskih cilina na višje subjekata, još je jedan prilog tomu. Najočitiji van je primjer moja Dalmacija, kojon se i ime zatrt pokušalo...

 

Pogledajte sindikate, udruge iz Domovinskeg rata, sejačke udruge, udruge civilneg društva... Koliko ih je? Ni broja in se ne zna. Ča mislite ko je zaslužan da ih je toliko da nan more „pozavidit“ i zemja sa dvadesetak puti višje stanovnika? Pulitiške elite, dakako! Sve je to njihovo maslo.

 

Jemaš desetak-petnaestak sejačkih udruga. Kad dođe do gusta, dvima-trima malo podiđeš i posa je obavjen. One se povuku, druge se počnu kolebat i privaćat mrvice po izreci „boje rebac u ruci vengo golub na grani“, i efekton domino kocki sejačka buna se sruši na fin i elegantan način.

 

Naši pulitišari nisu nimalo naivni, posebno ADZ-ovi. Pa su se unaprid, predviđajući morebitni razvoj događaja, pobrinili da u svoje kolo uvuku stranku koja bi tribala bit sejačka perjanica – Rvacku sejačku stranku. Mala digresija – jema li u toj stranci i jedan sejak? Meni pari da nima. I, kad je buknila sejačka buna, di je bila ta perjanica, ti HSS? Povist se, nažalost prečesto, ponavja – bija je na istin pozicijama ka i ijududevestočeteresprve!

 

Još gora situacija je s radnicima. Oni ni nemaju stranku koja bi ih zastupala. SDP, usprkos retorici, to nije. A sindikata jema ka gjiva potla kiše. Razjedinjenih po gori spomenutoj taktici...

 

Evala van i dobro mi stojte!
Broj komentara: 12
permalink  print  komentiraj


07.03.2010. nedjelja

DAN ŽENA - ČESTITKA
Broj komentara: 11
permalink  print  komentiraj


05.03.2010. petak

HIT SUVENIR I SEJAČKA BUNA

Ovo mi je fikala jedna naša blogerica ča radi u javnu (štij državnu, bogati!) firmu, s tvrdnjon da njen šef još nima ti suvenir i da je ona sigura da ga neće ni jemat. E, ali onda će i ona ostat bez suvenira! Baš mi je žaj. A kako vi stojite, drage moje i dragi moji? Jema li ko šansu za osvojit ovi lipi suvenirčić na konto svog šefa?


Inače, pratin ja sejačku bunu, kako da ne. Samo, jebi ga, vidin da ni od nje neće ništa bit. Sejaci su opet razjedinjeni - niki bi nastavili s bunon, drugi bi da in se da umitno gnojivo umisto love (vajda se mislidu bavit crnon berzon!) pa bi od bune odustali, a treći su neodlučni i ponašadu se Mačekovski - pričekat i vidit kako će se rasplest stanje. Opet će izvisit, prevest će ih žedne priko vode.
Isto mi dođe milo onega ugojeneg čobana ča glumi ministra pojoprivrede. Kad god se ukaže na ekranu pari da će sad zaplakat. Vengo ča vi mislite, kako čoban, koji cili dan trče za blagon (ovcama, kozama, gudinima, kravama...), more bit onako ugojen?!

Evala van i dobro mi stojte!
Broj komentara: 7
permalink  print  komentiraj


04.03.2010. četvrtak

NOVA HIT FRIZURA

Našin damama na znanje i ravnanje!

Evala van i dobro mi stojte!
Broj komentara: 4
permalink  print  komentiraj


03.03.2010. srijeda

K A D

Kad Tišine ton se

Zadnji slegne

Kada krikon

Pod čemprese stare legne

I kad niki prijatej mi

Nekrologon počasti me

Spustit ćete

Predat ćete

 Di mu misto moje tilo

Tamo di je uvik bilo

Prepustit ga majci zemji

Zelen travi i repcima

I ćukanju noćneg ćuka

Ča se javja iz dajine

S moje stare didovine


Evala van i dobro mi stojte!
Broj komentara: 8
permalink  print  komentiraj


01.03.2010. ponedjeljak

ISPOVIJED JEDNOG TAJKUNA

„Oče duhovniče, priznajem – sve što imam pokrao sam, opljačkao, oteo, popalio..., samo sam školu i vozačku dozvolu pošteno platio!“


Evala van i dobro mi stojte!
Broj komentara: 6
permalink  print  komentiraj


28.02.2010. nedjelja

PAS I MAŠAK

Pri nikoliko dana svitski mediji su objavili, a naši brže boje prenili, vist o najvećen pasu na svitu. Radi se, pari mi, o nikoj tudeškoj dogi, koja je, uistinu, pravi div među pasima, a bome i među judima. Od svizi parametara koji su bili navedeni, zapametija san samo težinu – jušto 110 kila!

 

E, ali kakvi bi mi to narod bili, kad i mi konja za trku ne bi jemali, a naši vridni novinari to iskopali i obznanili. Tako je jutros u jednoj novini osvanija veliki crjeni naslov na naslovnici: „Maza Eric najveći mačak u Hrvatskoj“! A napis o ten mašku, zajedno sa slikama, zauzeja je deboto stranicu i po novine. Pinkicu manje od napisa o pretučenen i opjačkanen ditetu u Sesvetama!

 

Iz teksta morete saznat da je mašak star tek godinu i da je dug cili metar i težak sedan i po kila, te da će rest još tri godine i dostić težinu oko petnes kila. Bogami ni malo, an, za jednega maška! Naravski da ti mašak jema i adekvatno ime i bezime – zove se Eric Nayeli i žive u Medulinu. Tako mu morete poslat i kartolinu ako baš oćete! E, da! Cina mu je prava sitnica, posebice za naše prilike – ciglih deset ijad kuna!

 

Dragi moji rvacki novinari, jedan veliki aplauz za vas od mojer malenkosti. Još kad biste se potrudili pa našli nešto isto tako pozitivno u našoj privredi, sa čime se moremo trkat sa sličnin svitskin konjima, bija bi van zafalan do groba! Znan da jema i takih u oven našen sivilu, znan da ih je malo, pa bi se baš zaraj tega i vridilo pomučit i nać ih, ka ča ste i ovega maška našli. Jerbo, ni on nije baš česta pojava.

 

Evala van i dobro mi stojte!
Broj komentara: 5
permalink  print  komentiraj


27.02.2010. subota

OGNJIŠTE

Na ognjištu rodnen

Koje ko zna kada

Zapališe daleki mi pređi

Naraštaje da nan grije

Da nas kruvon rani

I nigda ne zgasne

Dok nan ime dura

Danas korov reste

I cablo poneko

A ime nan još se

Ugasilo nije

Iako brez krivnje

Za to mučno stanje

Mene sram rastače

I čežnja me vuče

Da još za života

Na ognjištu rodnen

Opet plam raspalin

I tako se baren

Pređima odužin


Evala van i dobro mi stojte!
Broj komentara: 7
permalink  print  komentiraj


25.02.2010. četvrtak

ČEMPRESI

Ja sanjan čemprese

One muške vitke

Ča se nebu uspinju

I one druge

Ženske široke

Malo nezgrapne

Ča jeli naliče

I gnizda repčija sanjan

Na njihovin visokin

Tankin vrhovima

I stareg Mijata sanjan

Kako s pomnjon

Čemprese mlade zaliva

Na javi znan

Kad san se raspline

Da nima višje Mijata

Davno odavna

Da je neman vatrena

Čemprese progucala

Iza sebe u trenu

Misečev pejzaž ostavila

Da nima višje

Ni živahnih rebaca

Kad kamenjar priti

I nimaš mista

Za gnizdo teplo sviti


Evala van i dobro mi stojte!
Broj komentara: 14
permalink  print  komentiraj